नाडाका सदस्यहरुबाट स्टलको माग अत्यधिक भएकाले ठाउँ अभावका कारण बैङ्क तथा वित्तीय संस्थालाई स्टल उपलब्ध गराउन नसकिएको नाडाका अध्यक्ष शम्भूप्रसाद दाहालले जानकारी दिए ।
नेपाल अटोमोबाइल्स डिलर्स एसोसिएसनले यस पटकको नाडा अटो सोमा बैङ्क तथा वित्तीय संस्थालाई स्टल दिएको छैन ।
नाडाका सदस्यहरुबाट स्टलको माग अत्यधिक भएकाले ठाउँ अभावका कारण बैङ्क तथा वित्तीय संस्थालाई स्टल उपलब्ध गराउन नसकिएको नाडाका अध्यक्ष शम्भूप्रसाद दाहालले जानकारी दिए ।
नाडा अटो सोमा बैङ्क तथा वित्तीय संस्थाको भूमिका अत्यन्तै ठूलो हुने भए पनि पहिला आफ्ना सदस्यलाई स्टल दिने र बाँकी रहे मात्रै अन्यलाई दिने व्यवस्था हुन्छ । यस पटक आफ्नै सदस्यबाट सबै स्टल बुक भएपछि बैङ्क तथा वित्तीय संस्थालाई स्टल नदिइएको दाहालले जानकारी दिए ।
उनका अनुसार स्टल लिएका कम्पनीले एक छेउमा बैङ्कलाई ठाउँ उपलब्ध गराएका छन् । यसअघि छुट्टै स्टल लिएर बस्ने गरेका बैङ्क तथा बिमा कम्पनीहरु यस पटक नाडाका सदस्यले लिएको ठाउँमध्ये थोरै लिएर बसेका छन् ।
नेपालमा नाडा अटो सोको महत्त्व र आकर्षण बढ्दै गएपछि ठाउँ अभाव हुँदै गएको हो । यस अघिसम्म टाटाले नाडा अटो सोमा आफ्ना ठूला गाडिका लागि स्टल लिँदै आएको थियो । तर, यो पटक टाटाले पनि ठूला गाडि राख्ने स्टल पाएन ।
एकातिर नेपालमा नयाँ कम्पनीका गाडी भित्रिने क्रम बढेको र अर्कोतिर प्रदर्शनीस्थल सानो भएकाले समस्या आएको नाडाका महासचिव कृष्णप्रसाद दुलालले जानकारी दिए ।
‘हाम्रा लागि जति धेरै स्टल उपलब्ध गराउन सक्यो, त्यति धेरै फाइदा हुन्थ्यो,’ दुलालले भने, ‘तर, प्रदर्शनीस्थल सानो भएकाले सबैलाई समेट्न सकिएन ।’
