भारतीय मिडिया मिररसँग कुरा गर्दै फेडरेसनका प्रबन्ध निर्देशक आरएस सोढीले अमूललाई नेपाल सरकारले नै बोलाएकाले अमूलले चाँडै नेपालमा उत्पादन थाल्ने बताएका छन् ।
भारतको गुजरात कोपरेटिभ मिल्क मार्केटिङ फेडरेसनअन्तर्गतको अमूल डेरीले नेपालमा आफ्नो डेरी स्थापना गरेपछि नेपालकै दूध प्रयोग गर्ने स्पष्ट पारेको छ ।
सहकारी मोडलमार्फत डेरी प्रडक्ट उत्पादन गरेर ख्याति कमाएको कम्पनीले नेपालमा आफ्नो कम्पनीले नेपालकै किसानको दूध प्रयोग गर्ने जनाएको हो ।
भारतीय मिडिया मिररसँग कुरा गर्दै फेडरेसनका प्रबन्ध निर्देशक आरएस सोढीले अमूललाई नेपाल सरकारले नै बोलाएकाले अमूलले चाँडै नेपालमा उत्पादन थाल्ने बताएका छन् । ‘हामीले स्थानीय दूध नै प्रयोग गर्ने गरेर उत्पादन गर्छाैं,’ उनले भनेका छन्, ‘यसले हाम्रो छिमेकी मुलुकमा पशुपालनमा आकर्षण बढाउने छ । हजारौं किसानलाई यसले सकारात्मक प्रभाव पार्ने उनले बताएका छन् ।’
नेपाल सरकारले आफूहरुसँग देशका आन्तरिक माग पूरा गर्ने उद्देश्यले गुजरात सहकारी मोडलमै नेपाल आउन आग्रह गरेको उनको भनाइ छ । साथै सरकारले स्थानीयवासीका लागि रोजगारको अवसर पनि पैदा गर्न इच्छुक छ । नेपाल सरकारको प्रस्ताव स्वीकार गरेर नै नेपालमा डेरी उद्योग स्थापना गर्ने अन्तिम तयारीमा रहेको उनले बताएका छन् ।
अमूलले नेपालसहित मध्यपूर्वमा पनि कम्पनी विस्तार गर्ने लागेको छ । अमूलले अमेरिका, अस्ट्रेलिया, न्युजिल्यान्ड, चीन, जापान र नेपालमा भारतबाट निर्यात गर्दै आएको छ ।
अमूल नेपाली बजारमा पहिलादेखि नै स्थापित एवम् परिचित भएकाले उत्पादनपछिको बजार लिन झनै सजिलो हुने प्रबन्ध निर्देशक सोढीले बताएका छन् ।
