आधुनिक प्रविधिको प्रयोग गर्दै व्यावसायिक तरकारी खेती गर्ने किसानलाई प्रधानमन्त्री कृषि आधुनिकीकरण परियोजनाअन्तर्गत स्थापना भएको पार्वतीपुरको तरकारी जोन कार्यक्रमले थप सहयोग गर्दै आएको छ ।
चितवन । २५ वर्षअघि खाडी मुलुकबाट फर्केर स्वदेशमै केही गर्नुपर्छ भन्ने उद्देश्यले भरतपुर महानगरपालिका पार्वतीपुरका एक किसान तरकारी खेती गरी उद्यमी बन्न सफल भएका छन् ।
टमाटरलगायत व्यावसायिक तरकारी खेती गर्न सुरुमा २० लाख रुपैयाँ लगानी गरेका व्यवसायी अमर सुवेदीले अहिले वार्षिक ७ लाख रुपैयाँ आम्दानी गर्न सफल भएका हुन् ।
खाडी देश मलेसियाबाट फर्केपछि आफन्तहरुले तरकारी खेतीमा गरेको सफलता देखेपछि आफूले पनि गरौं भन्ने सोच आएपछि तरकारी खेतीको व्यावसायिक उत्पादन गर्न थालेको सुवेदीको भनाइ छ ।
७ बिघा जग्गामा उनले विभिन्न बेमौसमी तरकारी खेती गर्दै आएका छन् । उनीजस्ता अन्य किसान पनि तरकारी खेती गर्दै व्यावसायिक बन्दै गएका छन् । आधुनिक प्रविधिको प्रयोग गर्दै व्यावसायिक तरकारी खेती गर्ने किसानलाई प्रधानमन्त्री कृषि आधुनिकीकरण परियोजनाअन्तर्गत स्थापना भएको पार्वतीपुरको तरकारी जोन कार्यक्रमले थप सहयोग गर्दै आएको छ ।
तरकारी जोन कार्यक्रममा अहिले ८३० जना किसान आबद्ध छन् । तरकारी जोन कार्यक्रम आएपछि व्यावसायिक र विपन्न वर्गका किसानले राहत महसुस गरेका छन् । तरकारी किसानलाई कृषिजन्य वस्तु उत्पादन, बजारीकरण, अनुदान सहयोग र आधुनिक प्रविधितर्फ व्यावसायिक बनाउन तरकारी जोन कार्यक्रम सफल भएको प्रधानमन्त्री कृषि आधुनिकीकरण परियोजना कार्यान्वयन एकाइ तरकारी जोन चितवन कार्यालयकी सूचना अधिकारी एवम् वरिष्ठ कृषिअधिकृत कमला न्यौपानेले बताइन् ।
कृषिमा नयाँ तथा आधुनिक थोपा सिँचाइ, नेट हाउस, नर्सरी, ट्याक्टरलगायत आधुनिक मेसीनहरु अनुदानमा दिन थालेपछि कृषकहरुको उत्साहजनक सहभागिता रहेको उनले बताइन् । घरमा खानका लागि मात्रै तरकारी उत्पादन गर्ने किसान अहिले आएर १० देखि ३० कठ्ठामा तरकारी खेती गरिरहेका छन् ।
हाल उक्त जोनमा आबद्ध ८३० जना किसानले ६६२ हेक्टर क्षेत्रफलमा तरकारी उत्पादन गरेको देखाएको छ । खासगरी फर्सी, काँक्रा, गाँजर, लहरे तरकारी, टमाटर, गोभी, राजमालगायतका थुप्रै कृषि उपजहरु उत्पादन हुने गरेका छन् ।
यहाँ उत्पादन भएका तरकारी नारायणगढ, काठमाडौं, बुटवल, पोखरालगायत अन्य थुप्रै जिल्लामा जाने गरेको किसानले बताएका छन् ।
केही समयअघि चितवनका एक किसानले उत्पादन गरेको बन्दा नबिकेपछि बारीमा नष्ट गर्नुपरेको स्मरण गराउँदै वरिष्ठ कृषिअधिकृत न्यौपानेले यस विषयमा राज्यले गम्भीर भएर लाग्नुपर्ने बताइन् ।
