अहिले नेपाल छिर्ने प्रवेशविन्दु सिमरा क्षेत्रमात्र रहेकोमा भारतले कम्तीमा थप दुई रुटका लागि अनुमति दिनका लागि गृहकार्य गरेको सँस्कृति, पर्यटन तथा नागरिक उडड्यन मन्त्रालयले जनाएको छ ।
अन्तर्राष्ट्रिय हवाई उड्डयनका लागि नेपाल छिर्ने रुट विस्तारका लागि भारतले स्वीकृति दिने सङ्केत गरेको छ । अहिले नेपाल छिर्ने प्रवेशविन्दु सिमरा क्षेत्रमात्र रहेकोमा भारतले कम्तीमा थप दुई रुटका लागि अनुमति दिनका लागि गृहकार्य गरेको सँस्कृति, पर्यटन तथा नागरिक उडड्यन मन्त्रालयले जनाएको छ ।
अन्तर्राष्ट्रिय हवाई सेवाका लागि नेपाल भित्रिने थप रुटमा छलफल गर्न एक साताभित्र नेपाली अधिकारी भारत जाँदैछन् । एयर रुट तथा इन्ट्री प्वाइन्ट थप गर्नका लागि नेपाल सरकारले भारतलाई पटक पटक अनुरोध गर्दै आइरहेको छ । पर्यटनमन्त्री जितेन्द्रनारायण देवले नेपालको अनुरोधलाई भारतले सकारात्मक रुपमा लिएको र त्यसका लागि छलफलमा बस्न तयार रहेको बताए । नेपालले धेरैअघिदेखि इन्ट्री प्वाइन्ट विस्तारका विषयमा भारतलाई जानकारी गराइरहेको र अहिले फेब्रुअरीमा बैठक हुने विषयमा भारतले जानकारी दिएको उनले बताए ।
त्रिभुवन अन्तर्राष्ट्रिय विमानस्थलमा आउने सबै अन्तर्राष्ट्रिय विमानहरु अहिले सिमराको आकाश हुँदै नेपाल प्रवेश गर्ने गर्छन् । एउटा मात्र प्रवेशविन्दु भएकाले रुट लामो र आकाशमा ट्राफिक जामको समस्या बढ्दै गएकाले सरकारले रुट विस्तारका लागि भारतको अनुमति माग्दै आइरहेको छ ।
मन्त्रालयले रुट विस्तारका लागि पूर्वबाट जनकपुर वा विराटनगरमध्ये एक र पश्चिमबाट महेन्द्रनगर, भैरहवा वा नेपालगन्जमध्ये कम्तीमा दुईओटा रुटका लागि अनुमति मागेको हो ।
प्राधिकरणका महानिर्देशक सञ्जीव गौतमले भारतसँग नेपाल प्रवेश गर्ने नयाँ तीनओटा प्रवेशविन्दुका विषयमा छलफल भैरहेको बताए । ‘हामीले पूर्व र पश्चिम दुवै क्षेत्रमा थप रुट विस्तारका लागि भारतलाई प्रस्ताव गरेका छौं’, उनले भने, ‘हामीले गरेको प्रस्तावका विषयमा भारतको नियमन निकाय सकारात्मक छ ।’
‘यहि विषयमा कुरा गर्न हामी दुईसाताभित्र भारतको कलकत्ता जाँदैछौं’, उनले भने । उपमहानिर्देशकको नेतृत्वमा नेपाली टोली भारतको एयरपोर्ट प्राधिकरणसँग बैठक बस्ने तयारी भैरहेको उनले जानकारी दिए ।
गएको साता सिङ्गापुरमा भइरहेको हवाई प्रदर्शनीमा समेत महानिर्देशक गौतमले भारतीय पत्रकारसँग थप रुटका विषयमा कुरा उठाएका थिए । ‘हामी भारतीय प्राधिकरणसँग छलफल गरिरहेका छौं र यसै वर्ष हवाई मार्गका लागि अनुमोदन प्राप्त गर्ने आशा गरेका छौं’, उनले भने ।
