गएको ३–४ वर्ष यता नक्कली सुनका गहनालाई सक्कली भन्दै विभिन्न व्यक्तिलाई ठगी गर्ने परियारलाई महानगरीय प्रहरी वृत्त कोटेश्वरको टोलीले काठमाडौंको जडीबुटीबाट गएको पुस १२ गते पक्राउ गरेको हो ।
नक्कली सुनका गरगहनालाई सक्कली भन्दै ठगी गर्ने ललितपुर उपमहानगरपालिका १३ का राजु परियारलाई प्रहरीले पक्राउ गरेको छ ।
गएको ३–४ वर्ष यता नक्कली सुनका गहनालाई सक्कली भन्दै विभिन्न व्यक्तिलाई ठगी गर्ने परियारलाई महानगरीय प्रहरी वृत्त कोटेश्वरको टोलीले काठमाडौंको जडीबुटीबाट गएको पुस १२ गते पक्राउ गरेको हो ।
नक्कली सुनका गहना भन्दै परियारले रवि तामाङ र रमेश मगरलाई ठगी गरेपछि प्रहरीले परियारलाई नियन्त्रणमा लिएको हो । केही समय तामाङले परियारबाट २ लाखका गहना किनेका थिए । त्यसैगरी अर्का पीडित रमेश मगरले १ लाख ९० हजारका गहना किनेका थिए ।
उनीहरु दुवैजनाले गहना धितो राखी पसलबाट ऋण लिन खोज्दा नक्कली गहना भएको खुलेपछि परियारको ठगीधन्दा बाहिर आएको हो । परियारले यसरी धेरै जनालाई ठगी गरेको हुनसक्ने प्रहरीको अनुमान छ ।
‘ललितपुरमा घर भएका परियारले पेप्सीकोलामा कोठा भाडामा लिएर बसेको देखियो, नक्कली गहनाको व्यापार गर्नकै लागि कोठा लिएका रहेछन्,’ काठमाडौं प्रहरी प्रमुख एसएसपी बसन्त लामाले भने ।
प्रहरीका अनुसार परियारले नक्कली गहनालाई सक्कली भन्दै कोटेश्वर क्षेत्रमा विभिन्न व्यक्तिलाई बिक्री गर्दै आएका थिए । परियारको नक्कली धन्दाबारे प्रहरीलाई पनि केही सूचना थियो । तर उनका बारेमा उजुरी नपरे पनि प्रहरीले उनलाई रेकी गर्दै आएको थियो ।
जब उनको नाममा ठगीको जाहेरी पर्यो प्रहरीले गएको १२ गते पेप्सीकोलाबाट पक्राउ गर्यो र उनको भाडाको कोठामा खानतलासी गर्यो । परियारको कोठाबाठ प्रहरीले विभिन्न प्रकारका नक्कली सुन तथा पत्थर भएका औंठी एवम् सिक्रीहरु बरामद गरेको छ ।
सुनजस्तै र सुन पसलमा पाउने जस्तै डिजाइनका बेरुवा औंठी, मुगाजस्तै देखिने नक्कली पत्थर राखेका औंठी र विभिन्न प्रकारका सिक्रीहरु प्रहरीले परियारको कोठाबाट बरामद गरेको छ ।
तयारी अवस्थामा रहेका नक्कली सुनका १० थान सिक्री, ३२ थान बेरुवा औंठी, १ थान बास्रलेट, कानमा लगाउने रिङ, टप लगायतका नक्कली गहना परियारको साथबाट बरामद गरिएको एसएसपी लामाले बताए ।
परियारले विभिन्न व्यक्तिलाई सस्तोमा गहना बिक्री गर्ने र उनीहरुलाई पसलमा नदेखाउन समेत आग्रह गर्ने गरेको प्रहरीले जनाएको छ ।
प्रहरीका अनुसार परियारले ठगी धन्दाबारे कसैले पत्तो नपाउन् भन्न नक्कली सुन किन्नेलाई ‘भन्सार छलीको सुनबाट बनाएका गहना हुन्, बिल हुँदैन, पसलतिर न देखाउनु होला, भोलि गहना जफत भए म जिम्मेवारी छैन,’ भन्दै मानिसलाई तर्साउने गरेका थिए ।
परियारले नक्कली गहना धेरैलाई बिक्री गरेको हुनसक्ने भन्दै कोही पीडित भए प्रहरीमा आउन एसएसपी लामाले आग्रह गरेका छन् । ‘परियारले धेरैलाई ठगी गरेको भन्ने हाम्रो ठहर छ, यदि कोही हुनुहुन्छ भने प्रहरीमा खबर गर्नुस्,’ एसएसपी लामाले भनेका छन् ।
पक्राउ परेका परियारलाई प्रहरीले ठगीमा मुद्दा दायर गरी अनुसन्धान थालेको छ ।
व्यक्तिबाट सुन किन्दै हुनुहुन्छ ? नक्कली पर्न सक्छ : प्रहरी
बजारमा नक्कली सुनका गहना देखाएर ठगी गर्ने गिरोह सक्रिय रहेको भन्दै प्रहरीले व्यक्तिबाट सुनका गहना किन्दा होस् पुर्याउन आग्रह गरेको छ ।
हेर्दा सुन जस्तै देखिने गहना सुनका नहुन सक्छन्, फेरि सस्तोमा पाइयो भन्दै किन्नेहरु धेरै रहेको भन्दै प्रहरीले त्यसरी सुन खरिद नगर्नसमेत सबैलाई सचेत गराएको छ ।
‘नक्कली सुनको कारोबार गर्ने गिरोह धेरै छन् भन्ने सूचना आएको छ, केहीलाई हामीले रेकी गरेका छौं, केहीलाई छिट्टै पक्राउ गर्दैछौं,’ महानगरीय प्रहरी प्रमुख एसएसपी बसन्त लामाले भने ।