आईकाओले आफ्नो बुलेटिन सार्वजनिक गरेर क्यानलाई निमन्त्रणा गरेपनि क्यानका महानिर्देशक सञ्जीव गौतमले मन्त्री अधिकारीलाई लिएर अर्काे साता क्यानडा जान लागेका हुन् ।
अन्तर्राष्ट्रिय नागरिक उड्डयन सङ्गठन (आईकाओ) ले नेपाललाई गम्भीर सुरक्षा चासोबाट हटाइएको प्रोत्साहन प्रमाणपत्र ग्रहणका लागि आईकाओले नेपाल नागरिक उड्डयन प्राधिकरणलाई निमन्त्रणा गरेपनि प्राधिकरणले पर्यटनमन्त्री रवीन्द्र अधिकारीलाई पठाउने भएको छ ।
आईकाओले आफ्नो बुलेटिन सार्वजनिक गरेर क्यानलाई निमन्त्रणा गरेपनि क्यानका महानिर्देशक सञ्जीव गौतमले मन्त्री अधिकारीलाई लिएर अर्काे साता क्यानडा जान लागेका हुन् । नेपालसहित १४ देशका निर्देशक तहका कर्मचारी उपस्थित हुने कार्यक्रममा प्रभावमा पार्न प्राधिकरणले मन्त्री अधिकारीलाई लैजान लागेको प्राधिकरणका एक निर्देशकले क्यापिटल नेपाललाई बताए ।
‘प्रधानमन्त्रीले मन्त्रीहरुलाई विदेश जान कडाइ गरिरहेकै बेला क्यानले मन्त्रीलाई प्रस्ताव गरेर क्यानडा लैजानु अर्थपूर्ण छ,’ उनले भने । आईकाओको निमन्त्रणा मन्त्रीलाई पनि आएको हैन क्यानलाई बुलेटिनमार्फत आएको हो, सामान्य निमन्त्रणमा प्रमाणपत्र थाप्न मन्त्री जानु राम्रो नहुने उनले बताए ।
यो कार्यक्रममा नेपालभन्दा पनि कमविकसित र विकसित मुलुकहरु पनि छन् तर अरु मुलुकबाट निर्देशक वा महानिर्देशक तहका कर्मचारी प्रमाणपत्र ग्रहण गर्न जाने भएकाले मन्त्रीज्यूलाई लैजान लागेको विषय अर्थपूर्ण रहेको उनको भनाइ छ ।
आईकाओले नेपाललाई झन्डै ४ वर्षपछि गम्भीर सुरक्षा चासोको सूचीबाट गत जुलाईमा हटाएको थियो । नेपालले सन् २०१७ मा सुरक्षा चासोको मापदण्ड पूरा गरेकाले आईकाओले प्रमाणपत्र प्रदान गर्न लागेको हो ।
नेपालसहित बङ्गलादेश, बुर्किना फासो, कोस्टारिका, तान्जिनिया, रुवान्डा, इक्वेटरियल घिनी, रोमानिया, पानामा, कुवेत, जोर्डन, इन्डोनेसिया, पोर्चुगल र फिनल्यान्डलाई आईकाआले क्याउन्सिल प्रेसिडेन्ट सर्टिफिकेट प्रदान गर्न लागेको हो ।
नेपालको हवाई सुरक्षा सम्मानका लागि प्रदान गरेको अवार्डका लागि मन्त्री नै जान लागेको प्राधिकरणका उपमहानिर्देशक राजन पोखरेलले बताए । ‘खासमा महानिर्देशक मात्र जाने योजना हो, तर आईकाओले तीन महिना नेपालमै बसेर धेरै सहयोग र सुझाव दिएको थियो । त्यसकारण मन्त्रीज्यू नै जान लाग्नुभएको हो,’ उनले भने ।
