पहिला नियुक्त भएका धेरै पर्यटन दूतहरु राजनीतिक रङ्ग मिसिएको पाइएकाले उनीहरुले बोर्डले दिएको जिम्मेवारी पूरा नगरेको पाइएका कारण उनीहरुलाई हटाएर नयाँ राख्न लागिएको प्रवक्ता बरालको भनाइ छ ।
विदेशमा रहेका नेपालीमार्फत् प्रचारप्रसार गरी पर्यटन प्रवद्र्धन गर्नका लागि नेपाल पर्यटन बोर्डले नयाँ दूत नियक्ति गर्ने तयारी गरेको छ । हाल नियुक्त भएका अधिकांश दूतहरु निष्कृय रहेको भन्दै पर्यटन बोर्डले नयाँ नियुक्ति गर्न लागेको हो ।
भएका दूतहरुको म्याद सकिएको र उनीहरुको म्याद थप्न बोर्डबाटै निर्णय गर्नुपर्ने भएकाले अधिकांश देशमा नयाँ राख्ने तयारी भइरहेको पर्यटन बोर्डका प्रवक्ता आदित्य बरालले जानकारी दिए । पहिला नियुक्त भएका धेरै पर्यटन दूतहरु राजनीतिक रङ्ग मिसिएको पाइएकाले उनीहरुले बोर्डले दिएको जिम्मेवारी पूरा नगरेको पाइएका कारण उनीहरुलाई हटाएर नयाँ राख्न लागिएको प्रवक्ता बरालको भनाइ छ । उनीहरुलाई २/३ महिनाभित्र नियुक्त गरिसक्ने तयारी बोर्डको छ । नयाँ पर्यटन दूत नियुक्तिका लागि बोर्डले गृहकार्य गरिरहेको जनाएको छ ।
भ्रमण वर्ष २०२० लाई लक्ष्य गरी स्रोतसाधन भएका, उच्च पदस्थ, त्यही देशको नागरिकता लिएका र आफ्नै स्रोतसाधन खर्च गर्न सक्ने खालका व्यक्तिलाई नियुक्त गर्ने तयारी पर्यटन बोर्डको छ । भनसुनका भरमा मात्र पर्यटन दूतमा नियुक्त भएकाहरुलाई हटाएर काम गर्न सक्ने खालका व्यक्तिलाई राख्न लागिएको प्रवक्ता बरालको भनाइ छ ।
बोर्डले पर्यटन दूत नियुक्तिका लागि छनौट समिति समेत बनाउने तयारी गरेको छ । पर्यटन दूत बन्नका लागि सम्बन्धित देशको राजदूतावासको सिफारिस अनिवार्य चाहिने छ । नियुक्त भएका पर्यटन दूतहरुले नेपालको विषयमा प्रचार प्रसार गर्नुपर्ने हुन्छ । प्रचारका लागि प्रचार सामग्री पर्यटन बोर्डले उपलब्ध गराउने छ । उनीहरुले त्यहाँका हवाई कम्पनी, कलेज तथा वैदेशिक नियोगहरुमा नेपालको प्रचार गर्ने, नेपाल जानुपर्छ भनेर उत्प्रेरणा जगाउने, भिसा प्रक्रियाका विषयमा सहयोग गर्ने र नेपाल उद्गमस्थल हो, तपाईंहरु जानुपर्छ भन्ने किसिमको सन्देशमूलक कार्यक्रम सञ्चालन गर्नुपर्ने हुन्छ ।
पर्यटन दूत बनेवापत् उनीहरुले कुनै सरकारी सुविधा पाउने छैनन् । तर उनीहरु आफैंले सचिवालय स्थापना गराउनु पर्ने प्रावधान छ । हाल क्यानडा, कतार, आयरल्यान्ड, बेलायत, थाइल्यान्ड, न्युजील्यान्ड, कोरिया, स्विट्जरल्यान्ड, पोर्चुगल तथा नर्वेमा एक एक जना पर्यटन दूत छन् भने चीन, डेनमार्क, बेल्जियम, फ्रान्स, नेदरल्यान्ड तथा सिङ्गापुरमा दुई दुई जना छन् । यसै गरी जर्मनी, जापान, रसिया र स्वीडेनमा तीन तीन जना र स्पेनमा चार, अष्ट्रे्लियामा पाँच तथा अमेरिकामा आठ जना पर्यटन दूत छन् ।
