पोखरा महानगरपालिका वडा नम्बर १७ ढुङ्गेसाँघु सीतापाइलामा निर्माण हुने सो पार्क आगामी डेढ वर्षभित्र सम्पन्न गर्ने योजना रहेको पार्क निर्माण कम्पनी आयु इन्टरटेन्मेन्ट्स प्राइभेट लिमिटेडका निर्देशक भरत गौतमले जानकारी दिए ।
काठमाडौं : पर्यटकीय नगरी पोखरामा निजी क्षेत्रको लगानीमा फिसटेल ड्रिम पार्क निर्माण हुने भएको छ । गण्डकी प्रदेशको राजधानीसमेत रहेको पोखरामा १३ जना युवाहरुको सक्रियतामा २५ करोड रुपैयाँको लागतमा पार्क निर्माण गर्न लागिएको हो ।
पोखरा महानगरपालिका वडा नम्बर १७ ढुङ्गेसाँघु सीतापाइलामा निर्माण हुने सो पार्क आगामी डेढ वर्षभित्र सम्पन्न गर्ने योजना रहेको पार्क निर्माण कम्पनी आयु इन्टरटेन्मेन्ट्स प्राइभेट लिमिटेडका निर्देशक भरत गौतमले जानकारी दिए ।
पोखराकै पहिलो सो पार्कमा फ्री फल टावर, मध्यम प्रकारको रोलरकोस्टर, सुपर वाटर स्प्ल्यासिङ, बच्चाहरुका लागि इन्डोर खेल मैदान र ८डी सिनेमा थिएटरलगाएत बनाइने उनले जानकारी दिए । प्राकृतिक दृष्टिकोणले पोखरा आफैमा सुन्दर रहेपनि बालबालिकाहरुका लागि खेल्ने र बिदा सदुपयोग गर्ने उपयुक्त स्थान नभएकै कारण पार्क निर्माण गर्न लागिएको उनको भनाइ छ ।
पछिल्लो समय पोखरामा आन्तरिक र बाह्य पर्यटक वृद्धि भइरहेका बेला पार्क निर्माणले पर्यटकको बसाइ अझै लम्बिने निर्देशक गौतमको विश्वास छ । हाल सो कम्पनीले पार्क निर्माणका लागि प्रारम्भिक वातावरणीय परीक्षण (आईई)का लागि राय सुझाव माग गरेको छ । कम्पनीले सोमबार एक सूचना प्रकाशन गरी १५ दिनभित्र आवश्यक सुझाव पेस गर्न आग्रह गरेको छ ।
पार्क निर्माणस्थलमा स्थानीय क्षेत्रको भौतिक, जैविक, आर्थिक, सामाजिक तथा साँस्कृतिक वातावरण र यिनका अवयवहरु तथा यिनीहरुबीचको अन्तरसम्बन्धमा पर्न सक्ने प्रभावका बारेमा सुझाव पठाउन सरोकारवाला व्यक्ति र सङ्घसस्थालाई अनुरोध गरिएको छ । आयोजनाको परामर्शदातामा प्रकृति कन्सल्ट प्राइभेट लिमिटेड छ ।
