फागुन २१ गते प्रधानमन्त्री ओली झापाबाट काठमाडौं आउँदै गरेको यति एयरलाइन्सको जहाज निर्धारित समयमा काठमाडौं विमानस्थलमा ल्यान्ड नभई आकाशमै आधा घण्टा होल्ड भएको थियो ।
काठमाडौं । प्रधानमन्त्री केपी शर्मा ओली चढेको जहाज आकाशमा आधा घण्टा होल्डमा परेपछि सरकारले छानबिन समिति गठन गरेको छ ।
फागुन २१ गते प्रधानमन्त्री ओली झापाबाट काठमाडौं आउँदै गरेको यति एयरलाइन्सको जहाज निर्धारित समयमा काठमाडौं विमानस्थलमा ल्यान्ड नभई आकाशमै आधा घण्टा होल्ड भएको थियो । भीभीआईपी चढेको जहाज आकाशमा आधा घण्टा होल्ड भएपछि अनुसन्धान गर्न सरकारले पर्यटन मन्त्रालयका सहसचिव सुरेश आचार्यको संयोजकत्वमा छानबिन समिति बनाएको हो ।
समितिमा प्रकाश ढकाल, नेपाली सेनाका क्याप्टेन सुवास थापा, पर्यटन मन्त्रालयका उपसचिव सूर्यवंशी शर्मा कँडेल र नेपाल नागरिक उडड्यन प्राधिकरणकी नविना कर्माचार्य छन् ।
उच्चपदस्थ अधिकारी चढेको जहाज के कारणले आकाशमा होल्ड भएको हो भन्ने विषयमा अनुसन्धान गर्नका लागि छानबिन समिति बनेको छानबिन समितिका संयोजक सुरेश आचार्यले बताए । भीभीआईपी चढेको जहाज नै होल्ड गर्नुपर्ने के त्यस्तो कारण थियो वा सुरक्षा सावधानी अपनाइएको थियो या थिएन भन्ने विषयमा पनि अनुसन्धान हुने आचार्यले बताए ।
प्रधानमन्त्री चढेको जहाज उडेपछि झापा र काठमाडौं विमानस्थलबीच समन्वय भएको छ कि छैन अनुसन्धान गर्ने र त्यसमा दोषी देखिए कारबाहीको सिफारिस हुने उनले बताए ।