संस्कृति, पर्यटन तथा नागरिक उड्डयन मन्त्रालयका सहसचिव सुरेश आचार्यले निगमको जाहाज उडाउने विषयमा सम्झौता गर्नका लागि दुई पक्षीय वार्ताको तयारी भइरहेको पुष्टि गरेका छन् । उनले नेपालका तर्फबाट लामो समयदेखि निगमको जहाज चीन उडाउन चाहिरहेको भए पनि विभिन्न कारणले अवरोध हुँदै आएकोमा अहिले चीन सरकारले नै वार्ताका लागि आह्वान गरेको बताए ।
काठमाडौं । छिमेकी मुलुक चीनमा नेपाल वायुसेवा निगमको जहाज उड्ने निश्चित भएको छ । साउन ७ र ८ गते चीनको बेइजिङमा हुने सिभिल एभिएसन एडमिनिस्ट्रेसन अफ चाइना र नेपालका प्रतिनिधिबीच हुने वार्ताले उडान तालिक र सहरको टुङ्गो लगाउने छ । निगमले चीनको गोन्जाओमा उडान गर्ने प्रस्ताव राखेको छ ।
संस्कृति, पर्यटन तथा नागरिक उड्डयन मन्त्रालयका सहसचिव सुरेश आचार्यले निगमको जाहाज उडाउने विषयमा सम्झौता गर्नका लागि दुई पक्षीय वार्ताको तयारी भइरहेको पुष्टि गरेका छन् । उनले नेपालका तर्फबाट लामो समयदेखि निगमको जहाज चीन उडाउन चाहिरहेको भए पनि विभिन्न कारणले अवरोध हुँदै आएकोमा अहिले चीन सरकारले नै वार्ताका लागि आह्वान गरेको बताए । दुई पक्षीय वार्तापछि चीनको कुन विमानस्थलमा कति ओटा उडान गर्ने भन्ने निश्चित हुने उनको भनाइ छ ।
दुई पक्षीय वार्ताका लागि मन्त्रिपरिषदले निर्णय गर्नेछ । मन्त्रिपरिषदको निर्णयपछि मात्र वार्तामा को को सहभागी हुने भन्ने टुङ्गो लाग्ने मन्त्रालयको भनाइ छ । चीनले वार्ताको मिति तय गरेसँगै पर्यटन मन्त्रालयले पनि एजेन्डा तयार पारिरहेको छ ।
औपचारिक वार्ताअगावै प्रस्तावित एजेन्डा, ट्राफिक राइट्सलगायत विषयमा ईमेलबाट छलफल गर्नेगरी मन्त्रालयले सिनियर एटीसी अफिसर प्रमोद नेपाल र एरोनटिकल इन्जिनियर तनुजा पोखरेललाई सम्पर्क अधिकृतका रुपमा तोकी आवश्यक काम सुरु गरिसकेका छन् ।
याे पनि पढ्नुहाेस्ः
गोन्जाओमा जहाज उडाउन चीनले एओसी नदिएपछि कूटनीतिक पहल थाल्दै एनएसी
निगमले यसअघि चीनका लागि नेपाली राजदूत लीलामणि पौडेलमार्फत कूटनीतिक पहल सुरु गरेको थियो । चीनले मागेको आवश्यक कागजपत्र पेस गर्दा पनि प्रतिक्रिया नआएपछि निगमले कुटनीतिक पहल गरेको थियो । अहिले वार्ताका लागि तयारी हुनुमा कुटनीतिक पहलको सफलता भएको मन्त्रालयको भनाइ छ ।
निगमले गत वर्ष ल्याएको दुई ओटा वाइडबडी जहाजले लामो दूरीमा उडान नगरेकै कारण आर्थिक नोक्सानी बेहोर्दै आएको छ । वाइडबडीले नयाँ गन्तव्यका रुपमा असार १९ गतेबाट जापान उडान गर्ने भएको छ ।
पछिल्लो समय भारतपछि चीनबाट धेरै पर्यटक नेपाल आउने गरेका छन् । भ्रमण वर्ष २०२० मा २० लाख पर्यटक भित्र्याउने सरकारले तयारी गरिरहेको बेला राष्ट्रिय ध्वजावाहक जहाज छिमेकी मुलुक चीनमा उडान गर्न पाएमा धेरै सहज हुने पर्यटन व्यवसायीहरुको भनाइ छ ।
होटल एसोसिएन अफ नेपाल (हान)का प्रथम उपाध्यक्ष विनायक शाहले निगमको जहाज चीन उडान गर्न सके धेरै पर्यटक नेपाल ल्याउन सकिने बताउँछन् ।