लामो समयसम्म वित्तीय स्रोत अभाव गराएको प्रति आक्रोशित खरेलले काम नगर्ने ठेकेदारलाई भन्दा काम गर्नका लागि भुक्तानी नदिएर काम रोक्ने कर्मचारीलाई पक्राउ गर्नुपर्ने बताए ।
अर्थ मन्त्रालयले विगत ६ महिनादेखि बिलको भुक्तानी नदिँदा हुलाकी राजमार्गको काम प्रभावित हुँदै गएको छ । विगत ६ महिना अगाडि २ अर्ब रुपैयाँको बिल अर्थ मन्त्रालयमा पेस गरे पनि अझैसम्म भुक्तानी नदिइँदा काम प्रभावित हुँदै गएको आयोजनाले जनाएको छ ।
समयमै मन्त्रालयले भुक्तानी नदिँदा ठेकेदारहरुले काम गर्न सकेका नसकेको हुलाकी राजमार्ग आयोजनाका प्रमुख श्यामप्रसाद खरेलले जानकारी दिए । उनले विभिन्न क्षेत्रमा भइरहेको सडक तथा पुल निर्माणका लागि गरी २ अर्ब रुपैयाँको बिल पेस गरेको ६ महिना हुँदासम्म पनि भुक्तानी नआएको बताए । ‘विभिन्न चरणमा हुने सडक तथा पुल निर्माणको बिल पेस गरेको ५/६ महिना भइसक्यो,’ उनले भने, ‘अर्थ मन्त्रालयमा पुगेर फाइल अड्कियो । भुक्तानी बिल आएको छैन ।’
लामो समयसम्म वित्तीय स्रोत अभाव गराएको प्रति आक्रोशित खरेलले काम नगर्ने ठेकेदारलाई भन्दा काम गर्नका लागि भुक्तानी नदिएर काम रोक्ने कर्मचारीलाई पक्राउ गर्नुपर्ने बताए । ‘सरकारी पैसा लिएर काम नगर्नेलाई थुन्नुपर्छ,’ उनले भने, ‘तर, यहाँ काम मात्रै भन्ने तर भुक्तानी नदिने प्रवृत्ति छ । समयमै बिल भुक्तानी नगर्ने त्यस्ता मन्त्रालयका कर्मचारीलाई पहिला थुन्नुपर्छ ।’
विभिन्न क्षेत्रमा सडक र पुल निर्माणका लागि समयमै भुक्तानी नहुनु मुख्य समस्या रहेको उनको तर्क छ । राष्ट्रिय गौरवको आयोजनालाई कुनै पनि वित्तिय स्रोतको अभाव हुन नदिने सरकारको लक्ष्य रहे पनि त्यसको कार्यान्वयन हुन नसकको आयोजनाका ठेकेदारहरुको भनाइ छ ।
राष्ट्रिय गौरवको आयोजनालाई वित्तीय स्रोत अभाव हुन नदिने मन्त्रालयको उद्देश्य रहेको अर्थ मन्त्रालयका सुचना अधिकारी तथा प्रवक्ता झक्कप्रसाद आचार्यले जानकारी दिए । ‘गौरवका आयोजनालाई स्रोत अभाव हुनु हुँदैन,’ उनले भने, ‘हुलाकी राजमार्गको विषय छ । बिल भुक्तानी सम्बन्धित निकायले दिनुपर्छ । यस विषयमा के भइरहेको बुझ्छु ।’
अहिले हुलाकी राजमार्गअन्तगत पूर्व—पश्चिम र उत्तर दक्षिण गरी कुल १ हजार ७ सय ९२ किलोमिटर सडक निर्माण गर्नुपर्छ । जसमध्ये ३ सय किलोमिटर भारतीय कम्पनीले निर्माण गरिरहेको छ । गत वर्षदेखि एक हजार किलोमिटर निर्माणको काम भइरहेको छ । हुलाकी राजमार्गमा एक सय ७० ओटा पुलहरु निर्माण गर्नुपर्छ ।
कामदार र इन्जिनियरको अभाव
हुलाकी राजमार्ग निर्माणका लागि आवश्यक दक्ष जनशक्तिको अभाव देखिएको आयोजनाले जनाएको छ । सडक तथा पुल निर्माणका लागि विभिन्न क्षेत्रमा थोरै सङ्ख्यामा कामदार कार्यरत छन् । त्यस्तैगरी प्राविधिक इन्जिनियरको सङ्ख्या पनि निकै कम छ । आयोजना प्रमुख खरेलका अनुसार एक इन्जिनियरले दुइ जिल्लाको सडक र पुल हेनुपर्छ ।
क्षतिपूर्ति र मुआब्जा विवाद उत्तिकै
हुलाकी राजमार्ग निर्माण गर्ने विभिन्न क्षेत्रहरुमा जग्गासम्वन्धि मुआब्जा र क्षतिपूर्ति नदिँदा काम अलपत्र परेका छन् । सडक विस्तार गर्न वन, वातावरण, विद्युत् विस्तार जस्ता समस्या आउने गरेका छन् । अहिले चितवन निकुञ्ज क्षेत्रबाट सडक विस्तार गर्नुपर्दा वन समस्याले पुल निर्माणको कामसमेत अलपत्र परेको आयोजनाले जनाएको छ ।
