झन्डै दुइ वर्षपहिले निर्माण सुरु भएको उक्त सडक अझै नबन्दा दुई देशीय व्यापार तथा पारवाहनमा असर परेको भन्दै आयोजनाले नाका विस्तारमा अवरोध हटाउँदै काम सम्पन्न गर्ने लक्ष्य लिएको हो ।
उत्तरी छिमेकी चीनसँग जोड्ने व्यापारिक नाकाका रुपमा मानिएको गल्छी—त्रिशूली—स्याफ्रुबेसी—रसुवागढी नाका विस्तार गर्दा आइपरेका समस्या र अवरोध हटाएर ट्र्याक निर्माणलाई छिटो सम्पन्न गर्नेतर्फ आयोजना लागेको छ । लामो समयदेखि मुआब्जा विवाद, निर्माण सामग्रीको अभाव, स्थानीय सरकार जनप्रतिनिधि र अन्य निकायबीच बढ्दो असमझदारी, लम्बिँदो कानुनी प्रक्रिया, स्थानीयको विवाद र वातावरणीय प्रभाव मूल्याङ्कन जस्ता समस्याका कारण आयोजना निर्माण ढिलाइ भइ काम प्रभावित हुँदै आएको थियो ।
झन्डै दुइ वर्षपहिले निर्माण सुरु भएको उक्त सडक अझै नबन्दा दुई देशीय व्यापार तथा पारवाहनमा असर परेको भन्दै आयोजनाले नाका विस्तारमा अवरोध हटाउँदै काम सम्पन्न गर्ने लक्ष्य लिएको हो । विगतमा देखिएका सबैजसो समस्या र अवरोध समाधान गरी निर्माण प्रक्रिया सम्पन्न गर्ने लक्ष्यमा रहेको आयोजना प्रमुख सुबोधकुमार देवकोटाले जानकारी दिए । अहिले विस्तृत आयोजना प्रतिवेदन स्वीकृत भएको, मुआब्जा वितरण कार्य अघि बढेको र टेन्डर प्रक्रिया साउन मसान्तभित्रै खोल्ने तयारी रहेको उनले बताए । ‘आयोजनामा पहिले जस्तो समस्या अहिले छैनन् । सबै समस्या समाधान गरी आयोजना सम्पन्न गर्ने लक्ष्यमा छौं’, उनले भने, ‘त्यसका लागि सबै पक्षसँग समन्वय गरेका छौं ।’
उनका अनुसार मुआब्जा वितरणका लागि २५ करोड रुपैयाँ छुट्याइएको छ । उक्त मुआब्जाका लागि झन्डै ७ सय जनाको निवेदन परेको छ । मुआब्जा रकम जिल्ला प्रशासन कार्यालयबाट वितरण भइरहेको उनको भनाइ छ । ६४ किलोमिटरको उक्त सडकखण्डमध्ये स्याफ्रुबेसी—रसुवागढी खण्डमा चीन सरकारको लगानीमा काम भइरहेको छ । केही महिनाअघि त्रिशूली—स्याफ्रुबेसी सडकखण्डको ट्र्याक नेपाली सेनाले खोलिसकेको छ । ट्र्याकको ग्राभेलिङ र कालेपत्रे निर्माणको कामका लागि डीपीआर स्वीकृत भई आगामी साउन मसान्तसम्म टेन्डर प्रक्रियामा जाने आयोजनाको दाबी छ । यता गल्छी—त्रिशूली खण्डमा कालेपत्रेको काम यस वर्ष १० प्रतिशत सम्पन्न गर्ने भने पनि काम हुन सकेको छैन । बर्खा सुरु भएकाले कालोपत्रेको काम प्रभावित हुने भन्दै ठेकेदारले काम नगरेको आयोजनाले बताएको छ ।
हालसम्म उक्त सडकको २५ प्रतिशत भौतिक प्रगति भएको आयोजनाले जनाएको छ ।