विभागले गत असारमा ट्रायल पास भएका तथा लाइसेन्सका लागि कुरेर बसेका सेवाग्राहीलाई लाइसेन्स वितरणमा निरन्तरता दिने भन्दै एक महिना लाइसेन्स आवेदनसमेत बन्द गरेको थियो ।
देशैभरबाट परम्परागत लाइसेन्स हटाएर स्मार्ट लाइसेन्स कार्यान्वयनमा ल्याइए पनि लाइसेन्स पाउन ९–१० महिना कुर्नुपर्ने बाध्यता अझै हटेको छैन । यातायात व्यवस्था विभागले गत महिना चार ओटा स्मार्ट लाइसेन्स छपाउन चार ओटा मोसिन खरिद गरेको थियो ।
करिब चार लाखले सवारी चालक अनुमतिपत्र (लाइसेन्स) को ट्रायल परीक्षा पास गरे पनि धेरैले लाइसेन्स पाउन सकेका छैनन् । स्मार्ट कार्ड कार्यान्वयनमा ल्याउनुअघि गर्नुपर्ने तयारी नहुँदा यस्तो अवस्था आएको विभागका कर्मचारीको भनाइ छ ।
विभागले गत असारमा ट्रायल पास भएका तथा लाइसेन्सका लागि कुरेर बसेका सेवाग्राहीलाई लाइसेन्स वितरणमा निरन्तरता दिने भन्दै एक महिना लाइसेन्स आवेदनसमेत बन्द गरेको थियो । पूर्वअर्थसचिव रामेश्वर खनालले लाइसेन्स नपाएको भन्दै आफ्नो ट्विटरमा गुनासो समेत व्यक्त गरेका छन् । दुई महिनादेखि लाइसेन्स नपाएको भन्दै यातायात विभागमा म्यासेज गर्दा अझै केही समय लाग्ने बताएने उनको भनाइ छ ।
त्यस्तै समाजिक सञ्जालमा रुवि सुवाल लेख्छन्, ‘लाइसेन्स पाउन ट्रायल पास भएको ६–७ महिना भइसक्दा पनि स्मार्ट लाइसेन्स पाउन सकेको छैन । के अब नवीकरण गर्ने समयमा मात्र पाउने हो ?’
मोहन खतिवडाको पनि उस्तै समस्या छ । अरुले ५/६ महिनामा लाइसेन्स पाएको आफूले भने एक वर्षमा पनि कुनै प्रतिक्रिया नपाएको उनको गुनासो छ । ‘एउटा जाबो स्मार्ट लाइसेन्स छपाउन एक वर्ष लगाउने विभाग र यसका कर्मचारीविरुद्ध चुइँक्क गर्न नसक्ने सरकारबाट स्मार्ट सिटीको सपना देख्नेजति धोबिखोलमा नुहाएर एक पटक पवित्र हुनु बेस भन्दै विश्वास बाबुले ट्विटरमा अक्रोश व्यक्त गरेका छन् । तर भौतिक पूर्वधार तथा यातायातमन्त्री रघुवीर महासेठ भने पुराना सेवाग्राहीलाई साउनभित्र स्मार्ट लाइसेन्स उपलब्ध गराउने दाबी गर्छन् । मेसिनमा गडबड नभएको अवस्थामा ४ लाखदेखि ५ लाखसम्मलाई लाइसेन्स दिन सकिने अवस्था रहेको उनको भनाइ छ । यसका लागि काम गर्ने सिफ्टको सङ्ख्या बढाइसकेको उनको दाबी छ ।
ट्रायल पास भएकालाई पास भएको भोलिपल्टै लाइसेन्स दिने व्यवस्था मिलाएको उनले बताए । ट्रायल दिँदा पास भएको नभएको अब एसएमएसमार्फत थाहा पाउने र बैङ्किङ प्रणालीअन्तर्गत पैसा बुझाउने व्यवस्था गर्न लागिएको उनले जानकराी दिए ।
यातायात विभागका प्रवक्ता तुलसीराम अर्याल भने लाइसेन्स वितरण धमाधम चलिरहेको बताउँछन् । दैनिक ५ हजार लाइसेन्सको माग भए पनि अहिले २ हजार छापिने गरेको विभागको भनाइ छ ।
ट्राफिक प्रहरीलाई झन् सास्ती
यातायात विभागबाट वितरण भएका स्मार्टलाईसेन्स जाच्ने मेसिन नहुँदा प्रहरीलाई झन् सास्ती भएको छ । प्रविधिविहीन प्रहरी स्मार्ट लाइसेन्स जाँचमा निरीह बन्नुपर्दा नक्कली लाइसेन्स बनाउने गिरोह यतिबेला सक्रिय बनेको ट्राफिक व्यवस्थापन महाशाखाका एसएसपी वसन्त पन्तको भनाइ छ । नक्कली लाइसेन्सधारीहरुले सवारी चलाएको पाउनु निकै गम्भीर विषय हो ।
‘यसले ठूलो भवितव्यको खतरा बढाएको छ,’ उनले भन, ‘स्मार्ट कार्डमा सिमकार्डमा जस्तै धातुको चिप्स जडान गरिएको हुन्छ, जसमा चालक र सवारीसँग सम्बन्धित डाटा स्टोर हुन्छ । कुनै सवारी चालक ट्राफिक प्रहरीको कारबाहीमा परे त्यसैमा रेकर्ड रहन्छ । तर हालसम्म न जाँच्ने मेसिन छ न सरकारले नै चासो दिएको छ ।’
स्मार्ट लाइसेन्स कार्ड जाँच्ने मेसिन खरिद गर्ने कार्यमा छलफल भइरहेको विभागका प्रवक्ता तुलसीराम अर्यालले बताए । उनका अनुसार लाइसेन्स जाँच गर्ने मेसिन खरिदको तयारी भइरहेको छ । ‘नक्कली लाइसेन्स किनबेचमा कर्मचारीको संलग्नता देखिए कारबाही गर्छौं’, उनले भने ।
कागजी सवारीचालक अनुमतिपत्रमा रहेको बेथिति अन्त्य गर्न सरकारले गत वर्षदेखि यो प्रक्रिया अघि बढाएको थियो । तर यो प्रक्रिया पनि अस्तव्यस्त बन्ने खतरा बढेको ट्राफिक प्रहरीको भनाइ छ । हामीलाई स्मार्ट लाइसेन्स जाच्ने मेसिन नदिँदा त धमाधम पक्राउ पर्न थालिसकेका छ अझ स्रोत र साधन भयो भने कति पक्राउ पर्लान एक प्रहरीले भने ।
