पाइलट प्रोजेक्टका रुपमा डेढ लाख स्मार्ट मिटर जडान गर्न त्यसको खरिदका लागि टेन्डर स्वीकृत चरणमा रहेको नेपाल विद्युत् प्राधिकरणका कार्यकारी निर्देशक कुलमान घिसिङले जानकारी दिए ।
काठमाडौं उपत्यकाभित्रका लागि डेढ लाख स्मार्ट मिटर खरिदका लागि टेन्डर स्वीकृत प्रक्रिया अन्तिम चरणमा पुगेको छ । पहिलो चरणमा सिङ्गल फेजका ९० हजार र थ्री फेजका ६० हजार स्मार्ट मिटर खरिद गर्न ठेक्का स्वीकृत हुन लागको हो । पाइलट प्रोजेक्टका रुपमा डेढ लाख स्मार्ट मिटर जडान गर्न त्यसको खरिदका लागि टेन्डर स्वीकृत चरणमा रहेको नेपाल विद्युत् प्राधिकरणका कार्यकारी निर्देशक कुलमान घिसिङले जानकारी दिए ।
‘काठमाडौं उपत्यकाका लागि ‘पाइलट प्रोजेक्ट’का रुपमा डेढ लाख स्मार्ट मिटरको टेन्डर स्वीकृतिको चरणमा छ,’ उनले भने, ‘स्मार्ट मिटर जडान गर्ने र त्यसको वितरण प्रणाली व्यवस्थापनको काम भइरहेको छ ।’
डेढ लाख स्मार्ट मिटर खरिदका लागि टेन्डर सार्वजनिक भई मूल्याङ्कन गरी आगामी एक महिनाभित्र ठेक्का स्वीकृत भइसक्ने प्राधिकरणका सूचना अधिकारी लीला अर्यालले जानकारी दिइन् । मुलुकभर लोडसेडिङ अन्त्य भएको घोषणा गरिए पनि बिहान र बेलुकाको ‘पिक टाइम’मा केही ठाउँहरुमा अझै लाइन काटिने गर्छ । बिहान र बेलुका विद्युत् खपत बढी हुने भएकाले त्यसको व्यवस्थापन गर्न र विद्युत् बचत गरी खपत बढाउन स्मार्ट मिटर उपयोगी हुने अर्यालले बताइन् । दिउसो र रातको समय विद्युत् खपत कम हुने र बिहान र बेलुकाको ‘पिक टाइममा’ विद्युत् खपत बढी हुने भएकाले त्यस्को सन्तुलन कायम गर्न स्मार्ट ग्रिड वितरण प्रणाली आवश्यक भएको उनले बताइन् ।
एक वर्षभित्र स्वदेशकै जलविद्युत् आयोजनाबाट उत्पादित विद्युतको खपत गर्न स्मार्ट मिटर जडान गरी स्मार्ट ग्रिड विरतण प्रणाली लागू गर्न लागिएको हो । आगामी एक वर्षभित्र साना तथा ठूला आयोजनाबाट गरी झन्डै २५ सय मेगावाट विद्युत् उत्पादन भइसक्ने स्वतन्त्र ऊर्जा उत्पादकहरुको संस्था (इप्पान) नेपालका अध्यक्ष शैलेन्द्र गुरागाईंले बताए । स्मार्ट मिटर जडान हुनु राम्रो पक्ष भएको औल्याउँदै उनले विद्युत् खपत गर्न विद्युत्तीय सवारीमा पनि जोड दिनुपर्ने बताए ।
स्मार्ट मिटर पिक आवर र अन्य समयमा फरक फरक गतिमा घुम्ने गर्छ । त्यसैले पिक आवरमा खपत गर्ने दिजुली महँगो हुनजान्छ । डबल सर्किट(रेडियल) वितरण प्रणालीमार्फत् लाइन वितरण गरिने हुँदा बर्खायामको दृष्टिकोणले पनि यो सुरक्षित हुने प्राधिकरणले जनाएको छ । सरकारले आगामी एक वर्षभित्र ८ लाख स्मार्टमिटर जडान गर्ने लक्ष्य लिएको छ ।
