आयोजना प्रमुख सुस्मित शर्मा भट्टराईका अनुसार उक्त जलविद्युत् आयोजनाले सर्भे लाइसेन्स सन् २०१२ मै पाए पनि पीपीए नहुँदा आयोजनाले गति लिन नसकेको हो ।
सङ्खुवासभाको मकालु गाउँपालिकामा निर्माण हुने भनिएको कसुवाखोला जलविद्युत् आयोजनाले ६ वर्षअघि सर्भे लाइसेन्स पाए पनि अहिलेसम्म विद्युत् खरिद सम्झौता (पीपीए) हुन नसक्दा निर्माणको काम हुन सकेको छैन । आयोजना प्रमुख सुस्मित शर्मा भट्टराईका अनुसार उक्त जलविद्युत् आयोजनाले सर्भे लाइसेन्स सन् २०१२ मै पाए पनि पीपीए नहुँदा आयोजनाले गति लिन नसकेको हो ।
४५ मेगावाट क्षमताको उक्त आयोजना निर्माणका लागि नेपाल विद्युत् प्राधिकरणसँग पीपीएको तयारी गरिएको प्रमुख भट्टराईले जानकारी दिए । उनले आगामी दसैंसम्म आयोजनाको पीपीए गर्न प्राधिकरणलाई आग्रह गरिरहेको बताए । ‘सन् २०१२ मा सर्भे भएको आयोजना हो,’ उनले भने, ‘पीपीए र फाइनान्सिङ क्लोजर नभएकाले निर्माण सुरु गर्न सकेका छैनौं ।’ पीपीए भएपछि आयोजनाको डिजाइनिङ, ठेकेदार छनोट र फाइनान्सिङ क्लोजर टुङ्ग्याई अगाडि बढ्ने योजना रहेको बताए ।
कसुवाखोला हाइड्रोपावर कम्पनी लिमिटेड आयोजनाको मुख्य प्रवद्र्धक हो । दसैंअघि नै पीपीए गरी कन्सल्टेन्सीसँग प्रपोजल माग्ने र निर्माणले औपचारिक गति पाउने उनले बताए । अहिले फाइनान्सिङ क्लोजर र अन्य इन्जिनियरिङ डिजाइनतर्फ कसरी जाने भन्ने विषयमा काम भइरहेको उनको भनाइ छ । नेपाल विद्युत् प्राधिकरणले ६ वर्षअघि सर्भे लाइसेन्स दिए पनि अझै पीपीए नगरिदिँदा आयोजना प्रभावित बन्दै गएको आयोजनाले आरोप लगाएको छ ।