उद्घाटनमा प्रधानमन्त्रीसहित सङ्घीय सरकारका मन्त्री तथा उपत्यकास्थित महानगर तथा नरपालिकाका मेयरहरुको उपस्थितिमा उद्घाटन भएका ती बस मेकानिकल टेस्ट नगरी नेपाल भित्रिएको खुलेको छ ।
काठमाडौं : पर्यटन तथा नागरिक उड्ययन मन्त्रालयले साझा यातायातले भित्र्याएका पाँच ओटा विद्युतीय बस मापदण्डविपरीत भएको भन्दै फिर्ता पठाउन निर्देशन दिएको छ ।
कार्तिक ६ गते प्रधानमन्त्री केपी शर्मा ओलीले निकै तामझामका साथ औपचारिक उद्घाटन गरिएका विद्युतीय बस तोकिएको मापदण्डअनुसारका नपाइएपछि सम्बन्धित बीओआईडी कम्पनीलाई फिर्ता लैजान वा साट्न निर्देशन दिएको हो ।
उद्घाटनमा प्रधानमन्त्रीसहित सङ्घीय सरकारका मन्त्री तथा उपत्यकास्थित महानगर तथा नरपालिकाका मेयरहरुको उपस्थितिमा उद्घाटन भएका ती बस मेकानिकल टेस्ट नगरी नेपाल भित्रिएको खुलेको छ ।
उद्घाटन भएको दुई महिनाभन्दा बढी भइसक्दा पनि बस साझा यातायातको ग्यारेजमा थन्क्याइएको थियो । अहिले आएर बल्ल बस मापदण्डविपरीत भएको खुलेको हो ।
पर्यटन सचिव कृष्ण देवकोटाले मेकानिकल इन्जिनियरले तयार पारेको रिपोर्टमा माग अनुसारका गाडी नआएकाले अस्वीकृत गर्ने निर्णय भएको बताए । उनले गाडी दिने कम्पनीलाई साट्न वा फिर्ता लैजान भनिएको जानकारी दिए ।
खासगरी लुम्बिनी क्षेत्रमा सञ्चालन गर्ने गरी लुम्बिनी बिकास कोषले ती विद्युतीय बस ल्याउने निर्णय गरेको थियो । त्यहाँ विद्युतीय चार्जिङ् स्टेसन समेत बनाइएको थियो । तर लुम्बिनी क्षेत्रमा विद्युतीय बस चलाउन पूर्वाधार नभएको भन्दै साझाले उपत्यकामा चलाउने गरी स्वामित्व लिएको थियो ।
लुम्बिनी क्षेत्रभित्र सञ्चालन गर्न ल्याइएका बसको चार्जिङ् स्टेसनसमेत अहिले प्रयोगविहीन छन् । साझा यातायातका निर्देशक महेन्द्रराज पाण्डेले प्राविधिक समस्याका कारण बस सञ्चालनमा ढिलाइ भइरहेको भन्दै आलटाल गरिरहेका थिए । बस भित्र्याउन एसियाली बिकास बैङ्कले सहयोग गरेको थियो ।
लुम्बिनी विकास कोषका सदस्य सचिव सरोजकुमार भट्टराईले मापदण्ड नपुगेको तथा पर्यटन मन्त्रालयले बस फिर्ता अथवा साट्ने विषयमा आफूलाई जानकारी नआएको बताए ।
