नेपाल विद्युत् प्राधिकरणसँग ०७१ फागुनमा विद्युत् खरिद सम्झौता (पीपीए) भएको उक्त आयोजना विसं २०७२ असारबाट निर्माण कार्य सुरु भएको थियो । आयोजना ४९.६ मेगावाटमा डिजाइन गरिएकोमा पछि ५४ मेगावाट पुगेको छ । बाँकी ४ मेगावाटको विद्युत खरिदबिक्री सम्झौता (पीपीए)को अन्तिम चरणमा पुगेको कम्पनीले जनाएको छ ।
लमजुङ । पिपल्स हाइड्रोपावर कम्पनीले निर्माण गरिरहेको ५४ मेगावाटको सुपरदोर्दी जलविद्युत् आयोजना ‘ख’ डेढ वर्षभित्र सम्पन्न हुने भएको छ । २०७७ असारसम्म आयोजना सम्पन्न गर्ने लक्ष्यअनुसार निर्माण भइरहेको छ । कम्पनीले नेपाल विद्युत् प्राधिकरणसँग ०७७ असारसम्म बिजुली उत्पादन गर्ने प्रतिबद्धता जनाएको छ ।
तोकिएकै समयभित्र आयोजना सम्पन्न गर्ने लक्ष्यअनुसार अहिले आयोजनाको काम तीव्र रुपमा भइरहेको पिपल्सका निर्देशक अर्जुन गौतमले क्यापिटल नेपाललाई जानकारी दिए । उनले अहिलेसम्म आयोजनाको समग्र भौतिक प्रगति ३५ प्रतिशत सम्पन्न भएको बताए । ‘आयोजनाको मुख्य मानिएको सुरुङ खन्ने काम ५१ प्रतिशत सकिएको छ,’ उनले भने, ‘त्योबाहेक २० किलोमिटर सडकलगायतका पूर्वाधारका काम सकिएका छन् ।’
६४० मिटर अग्लो हेड रहेको उक्त आयोजनामा २ ओटा टर्बाइन रहनेछन् । सुरुङको हेड रेस ५.१ किलोमिटर रहेको छ । आयोजना निर्माण भएपछि वार्षिक ३२ करोड युनिट विद्युत् उत्पादन हुने निर्देशक गौतमले जानकारी दिए । सानिमा बैङ्कको अगुवाइमा सातओटा बैङ्कको ऋण लगानी आयोजना निर्माण भइरहेको छ । आयोजनाको प्रारम्भिक कुल लागत अनुमान ८ अर्ब ८० करोड रुपैयाँ छ । आयोजनामा सिभिलतर्फ हाई हिमालयन हाइड्रा कन्स्ट्रक्सन, वज्रगुरु कन्स्ट्रक्सन र बीपीसी कम्पनीले काम गरिरहेका छन् ।
नेपाल विद्युत् प्राधिकरणसँग ०७१ फागुनमा विद्युत् खरिद सम्झौता (पीपीए) भएको उक्त आयोजना विसं २०७२ असारबाट निर्माण कार्य सुरु भएको थियो । आयोजना ४९.६ मेगावाटमा डिजाइन गरिएकोमा पछि ५४ मेगावाट पुगेको छ । बाँकी ४ मेगावाटको विद्युत खरिदबिक्री सम्झौता (पीपीए)को अन्तिम चरणमा पुगेको कम्पनीले जनाएको छ ।
आयोजना निर्माण भएपछि उत्पादित विद्युत् लम्जुङको कीर्तिपुर सबस्टेसनमा जोडिनेछ । हाल उक्त सबस्टेसनको काम पनि तीव्र रुपमा अघि बढेको छ । दोर्दी करिडोरमा मात्रै निजी लगानीमा आधा दर्जन आयोजना निर्माणाधीन छन् ।