हालको जनता बैङ्कसँग गाभिनुअघि सिद्धार्थ डेभलपमेन्टका सीईओ अजयकुमार मिश्र, तिनकुने शाखा प्रमुख गीता शर्मा सुवेदीलगायत बैङ्कका कर्मचारी मिलेर कृष्ण चौधरीको नामबाट सो कर्जा प्रवाह गरेको प्रहरी अनुसन्धानबाट खुलेको छ ।
काठमाडौं । जनता बैङ्क (तत्कालीन सिद्धार्थ डेभलपमेन्ट बैङ्क) सिद्धार्थका प्रमुख कार्यकारी अधिकृत (सीईओ ) र शाखा प्रबन्धक मिलेर भिरपाखामा भएको जग्गालाई पिच बाटो भन्दै नक्कली कागजपत्र बनाएर २ करोेड २५ लाख रकम निकालेको तथ्य फेला परेको छ ।
हालको जनता बैङ्कसँग गाभिनुअघि सिद्धार्थ डेभलपमेन्टका सीईओ अजयकुमार मिश्र, तिनकुने शाखा प्रमुख गीता शर्मा सुवेदीलगायत बैङ्कका कर्मचारी मिलेर कृष्ण चौधरीको नामबाट सो कर्जा प्रवाह गरेको प्रहरी अनुसन्धानबाट खुलेको छ ।
२०७३ साल असार २९ मा चौधरीको नामबाट उनीहरुले उक्त रकम निकासा गरेका थिए । तिनकुने शाखा प्रमुख सुवेदी, नक्कली जग्गाको मुल्यांकन गर्ने सञ्जय दुधानी, कर्जा शाखाकी अनुजा डंगोल, लिलावती चौलागाईँ र कर्जा समितिमा रहेका सीईओ अजयकुमार मिश्र, सुजन सुवेदी, रबी शाक्य र मुकुन्द त्रिपाठी मिलेर काठमाडौं इचंगुनारायण १ मा कित्ता नम्बर १६७,१६९,१८८८ र १८९को भिरमा रहेको अर्को ब्यक्तिको जग्गालाई कृष्ण चौधरीको नाममा नक्कली कागजपत्र बनाएर उक्त कर्जा प्रवाह गरेका थिए ।
त्यसरी भिरमा भएको जग्गालाई समथर र पिच बाटो भन्दै बैङ्कलाई हानी पुर्याउने सीईओ, प्रबन्धकलगायतका कर्मचारीलाई प्रहरीले पक्राउ गरी कीर्तेमा मुद्धा चलाएको छ । उनीहरुले उक्त ऋण दिँदा वडा कार्यालय, नापी कार्यालय र मालपोतको नक्कली कागज बनाएका थिए ।
त्यसैगरी भिरपाखामा भएको जग्गा मिलाउने कार्यमा संलग्न कृष्ण चौधरीका भाई रमेश चौधरीलाई पनि प्रहरीले पक्राउ गरी मुद्धा चलाएको छ । ऋणी चाैधरी बाहेक अन्य सबै फरार छन्। सीओ मिश्र र तिनकुने शाखा प्रमुख गीता मिलेर योजनावद्ध रुपमा बैङ्कलाई हानी पुर्याएको प्रहरी अनुसन्धानबाट खुलेको छ ।
जनता बैङ्कमा गाभिएपछि बिगतका कागजहरु पल्टाएर हेर्दा उनीहरुलले बैङ्कलाई नोक्सानी पुर्याएको खुलेपछि जनता बैङ्कले महानगरीय प्रहरी परिसर काठमाडौंमा छानविनका लागि निवेदन दिएको थियो ।
त्यसपछि प्रहरीले वडा कार्यालयदेखि मालपोत हुँदै नापी कार्यालयसम्म पुगेर अनुसन्धान गर्दा उनीहरुले सबै कागजपत्रहरु नक्कली बनाएर ऋण निकासा गरेको खुलेको हो । सीइओ मिश्र, शाखा प्रमुख सुवेदीलगायत ठगीमा संलग्नहरुलाई प्रहरीले सरकारी सहिछाप किर्तेमा मुद्धा चलाएको छ ।
